ఎక్కడబడితే అక్కడ అడ్డంగా దోచుకుతినే ప్రభుత్వాలు వెలుస్తున్న ఈ రోజుల్లో తన నిజాయితీతో, సేవలతో మంచి IAS ఆఫీసర్ గా ప్రజల మన్ననలందుకున్న జేపీ(జయ ప్రకాశ్) గారు ప్రజల నాయకుడిగా ముందుకు రావడం రాష్ట్ర ప్రజల అదృష్టం.

ఒకడు కలర్‌ టీ.వీలంటాడు, ఇంకోడు బియ్యం, కరెంటూ ఫ్రీ, ఫ్రీ అంటాడు, మరొకడు నా రాష్ట్రం నాక్కావాలి ఇచ్చేయ్ మంటాడు, ఇహ చివరిగా వచ్చినోడు మీ గీత మీరే గీస్కోండంటాడు! అంతేగాని.. ఒక్కడు, ఒక్కడు.. ఒక్కడంటే ఒక్కడు "అరరే, మన రాష్ట్రం (మనవల్లే) ఇలా దరిద్రంలో నాని ముద్దవుతుందే, దీనికి ఇప్పుడన్నా ఏమన్నా చేసెడుద్దామా?" అన్న ఆలోచన చేయాడే? రాష్ట్ర ప్రజలకి ఇదే నా మనవి - పదే పదే అదే వలలో పడి మూతి పళ్ళు రాల్చుకున్నది చాలు. ఒక్కసారి తెరిపారా ఆయా పార్టీల ఎజెండాలకేసి ఎగాదిగా చూడండి. వాళ్ళేమేం చెప్తున్నారో, వాటి వెనుక వున్న భావాలేంటో తూకం వేసి చూసుకోండి. గుడ్డిగా ఓటు వేసి ఆ ఓటు హక్కుకున్న పవర్ ని కించపరచకండి! లోక్ సత్తా ఇచ్చిన వాగ్ధానాలను(మేనిఫెస్టో దింపుకోండి) ఒక్కసారి గమనించండి. మన తరానికి, మన ముందు తరాలకీ ఎంతగానో ఉపయోగపడే అద్భుతమైన ప్రణాళిక అది. అందులో ఉన్న అన్ని అంశాలు, అన్నీ... చేయగలిగినవే, లోక్ సత్తా అధికారంలోకి వస్తే తప్పకుండా జరిగేవే.

ఇంకో సంగతి, "ఆయా పార్టీలకి *అంగ* బలం అంతలా ఉంది కాబట్టే వాళ్ళాలా నెట్టుకొస్తున్నారు. జేపీగారికి అలాంటి అంగ బలం ఏదీ? ఆయన వారిలా అజమాయిషీ చేయలేడు బాబాయ్!" అని నోరు బార్లా తెరిచి బావురుమనేవారికి ఇదే నా సమాధానం - మీ దృష్టిలో రాష్టం అలా *అంగ* బలం ఉన్నవారి చేతుల్లో సురక్షితంగా ఉంటుందనా?? రాజుకి కావాల్సింది మేధా సంపత్తి, రాజనీతి! అంతేకానీ అరాచకత్వం, కుటిలనీతి కాదు! అలా అణచివేతలతో ఏలిన వాడి హయాంలో ప్రజలు బాగుపడినట్టు, సంతోషంగా ఉన్నట్టు చరిత్రలో లేదు! ఒక IAS ఆఫీసర్ గా ఆయనకి ఇప్పుడున్నవారికంటే తెలవాల్సినవి మెండుగానే తెలుసు. ఒక్క ఉదాహరణ చెబుతా.. ఇదివరకు రాజుల పరిపాలనలో రెండు దళాలుండేవి, బటులు, బందిపోటులు. కొందరు రాజులు, అతితెలివితో బందిపోటుల్ని కూడా అక్కున చేర్చుకుని ఆదరించి, వారి "సహయాంతో" ప్రజల్ని చీల్చి, చెండాడి - పరిపాలించారు. ఇప్పటి ప్రభుత్వాల్లో కూడా రెండు దళాలున్నాయ్. ఒకటి పోలీసులు, రెండు గూండా ముఠాలు. ఇప్పటి *మరీ అతితెలివి* నాయకులు ఆ గూండా ముఠాల సహాయంతో, మరింత బరోసాగా ఉంటుందనో ఏమో, పోలీసుల సాయం కూడా తీసుకుని రాష్టాన్ని తెగ ఏలేస్తున్నారు.

ఇహ మీ ఇష్టం బాబులు - దొంగలరాజునే కోరుకుంటారో, ధర్మరాజునే ఎన్నుకుంటారో!

మరో ముఖ్యమైన విషయం - "ఉన్నవాళ్ళలో జేపీయే బెటర్" అని మాత్రం ఎక్కడా అనకండేం, అలా పోల్చడానిక్కూడా అవతలి వారికి ఒక అర్హత ఉండాలి. నా భావనలో లోక్ సత్తా తో పోల్చబడడానికి ఆ అర్హత ఉన్న పార్టీ ఏదీ లేదనే. ఇంకో మాట - మన బాబు గారు, రాజా గారు మంచి వారు కాదని నేనెప్పుడూ అనను, అనుకోను. ఇద్దరూ రాజనీతి పారంగతులే, సకల కళా కోవిదులే! రాజొక్కడే మంచివాడై ఆయన దళం గందరగోళమైతే ఆ రాజు మాత్రం ఏం చేయగలడు పాపం? కానీ జేపీ గారు తన బృందాన్ని చాలా జాగ్రత్తతో నిర్మించుకున్నారు, అందరూ సమిష్టిగా రాష్ట్ర ప్రగతిని కోరుకునే విధంగా. మిగతావాళ్ళు అలా చేయలేకపోయారు. అలా చేయలేకపోవడం మాత్రం వాళ్ళ అసమర్థతే, అలా కాని పక్షంలో ఆ అసమర్థత రాష్ట్ర ప్రజలది - ఇవన్నీ తెలిసీ(తెలియక) అలాంటి వారిని నాయకులుగా ఎన్నుకున్నందుకు.